ಕವನ : ಏನು ?

ನನ್ನನ್ನು ಸದಾ ನನ್ನೊಳಗೆ ಕಾಡುತ್ತಿರುವದೇನು

ಆ ಭಾವದ ಸ್ವರೂಪವೇನು 

ಒಂಟಿತನವೊ ಇಲ್ಲ

ಅಸಹಾಯಕತೆಯೊ ಇಲ್ಲ 

ಜೀವನ ಅಭದ್ರತೆಯೊ ಇಲ್ಲ 

ನಡುವಯಸ್ಸನು ದಾಟುತ್ತಿರುವ ಭಯವೊ ಇಲ್ಲ

ಎಲ್ಲರು ಅಲಕ್ಷಿಸುತ್ತಿರುವರು ಎಂಬ ಭಾವವೊ ಇಲ್ಲ 

ಜವಾಬ್ದಾರಿ ನಿರ್ವಹಣೆಯ ಒತ್ತಡವೊ ಇಲ್ಲ 

ಸುತ್ತಲ ಸಮಾಜದ ಅರಾಜಕತೆಯೊ ಇಲ್ಲ

ಜೀವನದ ಹಾದಿಯ ಕತ್ತಲೆಯ ಸುರಂಗ ಹತ್ತಿರವಾಗುತ್ತಿರುವ ಭಯವೊ ಇಲ್ಲ

ಇದ್ಯಾವುದು ಅಲ್ಲದ ಮತ್ತೇನೊ ಗೊಂದಲವೊ

ನನ್ನೊಳಗೆ ನಾನು ಕಳೆದುಹೋಗುತ್ತಿರುವ ಈ ಪ್ರಶ್ನೆಗೆ 

ಉತ್ತರ ಹುಡುಕುವ ಕ್ರಿಯೆಯೆ ಹೆಸರು ಸಾಹಿತ್ಯ ರಚನೆಯೆ?